وافاه اجله لاصحى من سكرة الدنيا

بسمه تعالى
اللهم صل على محمد وال محمد
امس وصلني إيميل بفلم عن عالم البرزخ وطبعااهو كتاب
عن عالم البرزخ لكن سوه على شكل فلم والفلم
إيراني مترجم عربي
والحقيقه ورأ ما شفت الفلم بيوم
وعشت بحاله فضيعه لأني للحظات
غمضت عيوني و شفت نفسي
مكان الممثل لكن الأمل وحسن الظن بالله موجود
بس فعلا اه لقلة الزاد ..كما قال الامام امير المؤمنين
والي زاد اكتائبي ان امس ورأ ماشفت الفلم بليل وصلني خبر
وفاة شاب بمنطقه قريبه على منطقتي
عمره ١٦ او ١٧ بسبب مرض السرطان
طبعا إحنا ندري انه مريض و الكل
كان يدعو له لكن حكمت الله و إرادته فوق كل شي
وانا لله وانا اليه راجعون
لما رحت العزا كان منظر والدته يصعب عالكافر
مع انها إنسانه مؤمنه و كانت تمسك أعصابها كثر ما تقدر
والمؤسف انه بعض الناس مالها حرمه للميت
كانت تضحك و تسولف
اما أنا...بروحه الفلم عفسني عفيسه مع انه الموت
نادر ما يغيب عني لكن نفسي الاماره بالسوء مرات تغفل غنه
ولما رحت العزا كان اكثر شي شاغل بالي
ومأذيني حال هالشاب..مره ثانيه تخيلت روحي
وطبعا الناس في وادي و ذهني بوادي ثاني
كنت افكر شكثر هالولد محتاج للاعمال الصالحه
على رغم صغر سنه و تخيلت حاله واهو بين ايدين ملك الموت
وحالته بالمغتسل
يا ترى كان صالح ولا غرته الدنيا
كانت المشاهد الي أبالي مره من الفلم
ومره من مصطفى الله يرحمه
ومره كنت اشوف نفسي بالكفن
الى ان انتبهت لصوت امه والملايه تحدث عن
ليلة الوحشه
"يمه يخاف وليدي و شلون حالته"
فعلا صغرت الدنيا بعيني واتمنى يدوم هالحال
لأني أنا بعد أخاف من الظلمه..ومحتاجه الأنس
في قبري ووحشتي ..

أتمنى كل من يقرا البوست يقرا سورة الفاتحه و
يهدي ثوابها لروح الشاب مصطفى لانه بامس الحاجه
لهالثواب...واتمنى بعد ان ما ينطبق على الي يقرون هالبوست
هالمقوله
"ما اكثر العبر واقل الاعتبار"
أترككم مع الفلم
www.shiatube.com
وأكتبوا في البحث سياحت غرب

تقبلو تحياتي
فجر الحمود