و الصلاة و السلام على خير البشر الحبيب المصطفى و اله الغرر
اليوم يا على بالي موضوع الصبح..و طبعا قبله موضوع مختلف تماما الليله الي قبلها لكن الله يقدرني و اقدر احشر الاثنين مع بعض مع انه الموضوع الاول عام و الثاني يمكن شخصي..
اليوم راح اتكلم عن حقوق المرأه في الاسلام على قد فهمي القاصر جدا و هذا لانه وايد ناس تستفزني لما يقولون انه المراه مضطهده في الاسلام..
يمكن انا اعتبر نفسي من المنفتحين على الراي الاخر و من اكثر المتقبلين له بحكم تربيتي في مجتمع اسلامي غربي..لكن كثير من الاحيان الاقي نفسي اقع في تناقض مستمر و السبب...اني اتعصب لاشعوريا و تعصبي و انحيازي في محله ! و من هالامور الي تثير تعصبي و انحيازي لها موضوع حقوق المراه في الاسلام لانه انا ماشوف ان الشريعه السمحه قصرت مع المراه بشي ! بالعكس الاسلام افسح المجال للمراه و اعطاها حقوقها و زود و حابه استعرض جوانب كثيره و من اهمها حقوق المراه في الزواج..
المراه المسلمه هي المراه العامله في شتى المجالات حيث ان الاسلام اتاح لها فرصة العمل
سمحلها بالسفر
سمحلها بالتعبير عن رايها في كل شي..و لو رجعنا للتاريخ الاسلامي لوجدنا ان المراه لها وقفات مشرفه كثيره و مواقف جليله في المجتمع بس عاد وين الي يقتدي؟ للاسف الاهتمامات انحطت لابعد مدى
اما لو يينا لموضوع الزواج و هو الي بسلط عليه الضوء اليوم ..
سمحلها الاختيار في الزاوج مع المراعاة لكثير من علماء الاسلام بفتوى اذن ولي الامر..
لكن ترى الي يبحث يلقى ان مو كل العلماء يتفقون على موضوع اذن ولي الامر في الزواج
و طبعا المهر من حق المراه و كل شي تعمله المراه ما عدا معاشرة الزوج..تؤجر عليه..بعد شيبون حريمنا؟ اكثر من جذي عداله و اهتمام و حقوق؟؟؟ مادري يعني الواحد وين يبي يوصل باتهام الاسلام بالتضييق على المراه؟
و احلى شي بصراحه الي عرفته من فتره قصيره ...و عجبني بشكل ما تتخيلونه انه ...في شي بالاسلام
الطلاق الخلعي
هو الطلاق بفدية من الزوجة الكارهة لزوجها يعتبر فيه بلوغ كراهتها حداً يحملها على تهديد زوجها بعدم رعاية حقوقه الزوجية وعدم اقامة حدود الله فيه
طبعا الي يقرا يقول..الله بالخير؟ تو الناس..لكن نظرتي لهالحق من حقوق المراه يمكن تختلف شوي...و هي ان بالاظافه انه الطلاق الخلعي يعطي المراه الحق بالطلاق...الا انه
يبين لهذه المراه شهامت هذا الرجل..او نذالته و يمكن الي يقرا يعارضني بالراي او يقول "بس هذا حقه الطبيعي مقابل فقدانه لزوجته" الا اني اقول لو صج مقدر يوم واحد من العشره الي بينه و بين هالزوجه ولا كان يوم من الايام يحترمها ويقدرها و حس انها صعب تكمل معاه و حابه تنفصل...يطلقها من غير ولا فلس!! فا الحلو و الاحلى بالطلاق الخلعي..انه يعطي المره مجال للاختبار يا انها ما تندم عالريال لو دفعها لانه يستاهل كلمة "ما يستاهل حسافه" و بجذي يكون باعها مقابل فلوس مالها قيمه(هذا الي انا اشوفه) اما اذا ما دفع و تمسك بالمره او طلقها بدون مقابل بيكبر بعينها و ممكن يكون مجال للصلح و العوده لانه بين لها مدى تقديره للعشره الي بينهم..
في احلى من جذي حقوق؟
بعد هالوقفه البسيطه و القااااااصره جدا..احب اقول
الي مو عاجبه الحقوق الي ماخذتها المره من الاسلام
"الي مو عاجبه ينتف حواجبه"
و شكرا :)
Regards..
لازم اكتب انجلش..تدرون تأثير "عقدة الخواجه " لووول
الى لقاء قريب ..مع الموضوع الشخصي الي ما كان له مجال في بوست اليوم
فجور
No comments:
Post a Comment